मेघदूतम् — 35 | meghadūtam

३५

पादन्यासक्वणितरशनास्तत्र लीलावधूतै रत्नच्छायाखचितवलिभिश्चामरैः क्लान्तहस्ताः ।

वेश्यास्त्वत्तो नखपदसुखान्प्राप्य वर्षाग्रबिन्दूनामोक्ष्यन्ति त्वयि मधुकरश्रेणिदीर्घान्कटाक्षान् ॥

वल्लभदेवः तत्र महाकालधाम्नि वेश्या भगवद्गणिकास्त्वत्तो भवत्सकाशान्नखपदसुखकरान्वर्षाग्रबिन्दून्प्रथमजलकणानासाद्य प्रीतिवशात्त्वयि भ्रमरपालीपृथुलान्कटाक्षानाक्षेप्स्यन्ति । कीदृश्यस्ताः । पादन्यासेन क्वणितरशना रणन्मेखलाः । तथा विलासवलितैर्बालव्यजनैः खिद्यमानकरा इति सौकुमार्योक्तिः । ता हि देवं वीजयन्त्यः सेवन्ते । कोदृशैस्तैः । रत्नच्छायया खचिताः प्रकटीकृता वलय उदरलेखा यैः । तासां हि वासोयुगाच्छादितानां चामरमणिभासा मध्यवलयः प्रकटीभवन्ति ॥

पदच्छेदः Click to Toggle

पादन्यासैः	पाद–न्यास (३.३)
क्वणितरशनास्	क्वणित (√क्वण् + क्त)–रशना (१.३)
तत्र	तत्र (अव्ययः)
लीलावधूतै	लीला–अवधूत (√अव-धू + क्त, ३.३)
रत्नच्छायाखचितवलिभिश्	रत्न–छाया–खचित (√खच् + क्त)–वलि (३.३)
चामरैः	चामर (३.३)
क्लान्तहस्ताः	क्लान्त (√क्लम् + क्त)–हस्त (१.३)
वेश्यास्	वेश्या (१.३)
त्वत्तो	त्वद् (५.१)
नखपदसुखान्	नख–पद–सुख (२.३)
प्राप्य	प्राप्य (√प्र-आप् + ल्यप्)
वर्षाग्रबिन्दून्	वर्ष–अग्र–बिन्दु (२.३)
आमोक्ष्यन्ते	आमोक्ष्यन्ते (√आ-मुच् लृट् प्र.पु. बहु.)
त्वयि	त्वद् (७.१)
मधुकरश्रेणिदीर्घान्	मधुकर–श्रेणि–दीर्घ (२.३)
कटाक्षान्	कटाक्ष (२.३)

छन्दः मन्दाक्रान्ता [१७: मभनततगग]

छन्दोविश्लेषणम्

१	२	३	४	५	६	७	८	९	१०	११	१२	१३	१४	१५	१६	१७
पा	द	न्या	स	क्व	णि	त	र	श	ना	स्त	त्र	ली	ला	व	धू	तै
र	त्न	च्छा	या	ख	चि	त	व	लि	भि	श्चा	म	रैः	क्ला	न्त	ह	स्ताः
वे	श्या	स्त्व	त्तो	न	ख	प	द	सु	खा	न्प्रा	प्य	व	र्षा	ग्र	बि	न्दू
ना	मो	क्ष्य	न्ति	त्व	यि	म	धु	क	र	श्रे	णि	दी	र्घा	न्क	टा	क्षान्
म			भ			न			त			त			ग	ग